Letras de inverno

Hoxe, cos boletíns de notas das vosas crianzas, recibiredes nas vosas casas, as nosas recomendacións lectoras para este inverno, libros que vos podedes regalar e ler ao calor da lareira ou na quentura da cama, e mesmo músicas que podedes bailar no medio da sala ou da cociña para librar o corpo do frío e as xeadas. 

Se queredes reciclar o folleto e difundilo entre familia e amizades, no lateral tedes a ligazón para descargalo. 

Agardamos que lle saquedes proveito á proposta. 

A mascota da Biblio 2: unha maleta perdida

Na Biblioteca apareceu unha maleta. Parece abandonada. Ou perdida. 

 Parece que é da nosa mascota, que a deixou esquecida coas présas por ir... aonde?

Tem algúns obxectos dentro. Que nos din da súa dona? Que lle gustará? A que se adicará?



Non sabemos! 

Saberedes vós?

 

A Mascota da Biblio 1: cartas.

Coñecedes a mascota da nosa Bilioteca? 

Nós tampouco... 

Boa falta nos fai ter unha. Necesitamos que lle dea nome a este blog (Rosalía de Castro di que prefire non estar aí na cabeceira) e que nos axude nas tarefas bibliotecarias. 

Por iso chegaron cartas esta semana. Cartas ás nenas e nenos de Infantil e Primaria. Deixounas a carteira a semana pasada en cada clase.

O servizo de correos foi rápido e eficiente!

A petición de cada carta: Poderíades axudar a facer unha mascota para a Biblio? Poderíades dicirnos quen é e como é?

E esta semana algo apareceu na Biblio....

Novembro:mes da ciencia II

Para acompañar o mes da ciencia e todas a restra de actividades que preparou a equipa científica da escola, na Biblioteca Escolar recorremos as estantes e buscamos libros, películas e documentais que puidesen interesarvos, e ben á vista os puxemos para que os coñezades e poidades levar á casa, se vos presta (porque emprestar, empréstase): 

Desde a tecnoloxía até o universo...

pasando polo espazo en que vivimos até chegar ás grandes mentes da historia...

Os ocos que hai nas mesas son de libros que xa voaron a algunha cociña ou algunha sala de estar...

Os dereitos da Infancia

Traballazo que fixo a profa Andrea para o cole!!

Esta semana visitará todo o alumnado de primaria a Biblio para coñecer a Escola respectuosa cos Dereitos da Infancia e que non é outra que a nosa.

Como Andrea quedou admirada da arquitectura encarnada do noso centro, decidiu construirlle un retrato:

A fachada imponente.

A fachada en pequeno.

E en cada xanela encarnada do cole, asoma un dos nosos dereitos,como nenas e nenos que somos ou fomos: 

Xanelas que se abrimos...

...mostran a utopía que nos anima.

Na biblio completamos o traballo cunha pequena selección de libros que tratan algún ou todos os Dereitos da Nena e do Neno. 

Escola e libros.

 Claro, o alumnado de quinto non aguantou as ganas e xa veu hoxe de visita!

Adiviñando o dereito atrás da contra.

E lemos algúns dos contos entre todas:

Todas menos algún... 😊

 

Novembro: mes da ciencia.

E entramos en novembro, mes da ciencia tamén na Biblio da Rosi. 

Todos os luns, nos recreos de Primaria e Secundaria, alumnado de 6º e de 2ºESO, coordinado polas profas Sandra e María Xosé, ocupan a biblio co seu obradoiro de Papiroflexia. 

Aprendendo a encartar papel..

Atende, que che explico!

En secundaria tamén se animan, para quen diga que non!

Pola metade, pregade pola metade!

Axudantes!

Xa sabedes, os luns, durante este mes, e mesmo despois se vos animades, 

OBRADOIRO DE PAPIROFLEXIA 

NA BIBLIO DURANTE OS RECREOS

 

 

O mes do Medo: as visitas á Exposición.

Unha vez argallado o Corredor do Medo na Biblioteca, toca darlle uso.

A proposta aos grupos foi a de facer a visita, acompañada dalgunha das seguintes actividades, unha sinxelas, outras máis elaboradas, ao gusto das consumidora:

• Hora de ler terrorífica: o alumnado fai a visita, escolle un volume, lévao á Biblioteca, le e cando acaba a sesión devólveo ao seu lugar na Expo.
• Lemos un conto de medo: aproveitando a escuridade, facer a visita escoller un conto, e lelo para o grupo às escuras, sentad@s tod@s no fondo do corredor.
• Sesión de contos de medo: levar pensados contos e historias de medo e facer unha sesión de contacontos á luz das lanternas.
• Visita e reserva de libros: se durante a visita algún alumno ou algunha alumna mostra interese por un dos documentos expostos, pode reservar o seu préstamo cando acabe a exposición, nun cadro que teredes enriba da mesa de préstamo, dentro da Biblio. Anotades nen@, curso e número de rexistro do documento.

Hoxe tocoulle a vez às nenas e nenos de Educación Infantil, que van de valentes pola vida, si, mais só cando a luz está prendida...

... porque cando a apagamos...



Ouh! continúan a ser valentes!!!

Que fracaso de Samaín!!!

Mes do Medo: a exposición.

Estas semanas andamos moi ocupadas na Biblioteca. 

Nos recreos de secundaria montamos uns obradoiros clandestinos de decoración samaínica, e nas titorías de primaria argallamos maneiras de representar o medo. 

A facer fantasmas...

...aínda que non o pareza!

As cabazas-globo deron ben de traballo!

...menos levaron a arañeira ou os morcegos dormentes.

Decoramos as xanelas para asustar o patio de Infantil, hehehe!

Seleccionamos os fondos terrorícos...

...porque recortar gatos negros e cabazas está ben, mais o obxectivo é mobilizar e difundir os libros, as películas, as músicas, que temos na biblio... 

Organizamos a exposición por temas...

no cemiterio bibliotecario.

A casa das malditas bandas deseñadas

Decoramos o corredor terrorífico... 

Con pantasmas chegadas de segundo EP...

 

Arañas chegadas de terceiro EP

 

... e de quinto EP...

 

...como o resto de portas...

...monstruosas!

E oscurecemos todo. 

Na visita para coñecer os libros: obrigado o uso de lanternas!!

Colle a túa!!

Non escoitas algo?

Ai, acabo de sentir unha sombra....

Que medo!!

O mes do Medo 2: concurso fotográfico!

Anímense, señoras e señores!!

O mes do Medo

A Bruxa Regañadentes!

 

Un clásico do terror, O corazón delator de Edgar Allan Poe, en versión tamén clásica:



E o máis moderno, Tim Burton:



E un conto en defensa dos animais:

Club de Lectura As Campaíñas: comezamos!

O mércores pasado, durante os recreos tivemos as xuntanzas informativas para ver a posibilidade de refundar o Club de Lectura As Campaíñas, como anunciamos polas aulas. 

Finalmente, contaremos con dous grupos: un integrado por alumnado de 1º ESO e outro con rapazas e rapaces de 4º a 6º de Primaria. 

Reunirémonos, de maneira alterna, unha semana unhas, outra semana outras, os martes, de 14.30 a 15.30.  E comezaremos este martes 11 de outubro, o grupo da ESO, comentando a nosas lecturas de verán. 

Lembrade, a profe leva o petisco!